ـــ عظيم كلّو مَشِيْ يا عادل صحيح، بسّ أنا ما خَطَرلي، أنا قلتلّك: مَشِي نصّ ساعة من البيت ونصّ ساعة الرجعة عالبيت.
ـــ إي ما هوّي هيك، هيدا الحاصل.
ـــ لا، الحاصل مش بس هيك، المشكلة إنّك عم تروح نصّ ساعة عـ«الخمّارة» والرجعة نصّ ساعة من وين؟ كمان من الخمّارة! وطبعاً مش رح إسألك قَدّيه عم تقعد بالخمّارة، كوني بعرف عَنَّك.. اي هيدا ما عاد المَشِي هالقدّ مفيد.
ـــ كيف شو دخل الخمّارة/ حكيم ما تنسى أوقات، إنّو أوقات الرجعة بتكون أطوَل.
ـــ أكيد أطوَل، انشالله ما تكون أطول بكتير يا عادل.
ـــ لأ، مش هالفَرْقْ، يعني أربعين خمس وأربعين دقيقة بدال النصّ ساعة.
ـــ إي شي حلو، ووقت مَشِي أطوَل بسّ مش صحّي ولا صحيح.
ـــ إنّو قصدك هيدا المَشي كلّو ضيعان؟
ـــ أكيد يا عادل.
ـــ طيّب ما أنا بالأساس كنت إلي فترة طويلة بشْرَب بالبيت، ووَلا يُمكن اشرب بهيدي الخمّارة ولا بأيّ خمّارة ببيروت!
ـــ عادل اقعود لحظة (قَعَدَ عادل) عادل... اسمعني... نحنا مش عم نناقش ولا نعالج وضع الخمّارات ببيروت، في وزارة الصحّة والسياحة هنّي بيهتمّوا بهيك تفاصيل.
ـــ يعني إنّو بتوافقني الرأي!
ـــ أكيد.
ـــ طيّب منيح (بيوقف) خلّيني إمشي أنا، ما هيدا مَشِي كمان، ومن عندك هيدا...
ـــ (وقف الحكيم)!!!

■ ■ ■


ـــ ما لازم انت يا رَجُل تتاخَد بالمنطق للي بيعلّموك ايّاه وهوّي المنطق العام السايد، لأنّو منطق حيواني ومفروض إنّو نحنا فئة إجت من بعد الحيوان، فئة تطوّرت من وعن الحيوان... إنّو كيف بيعلّموك إشيا متل: الصغير بيبقى ضعيف وحرف ساقط يعني، أو إنّو شي بينكبّ عا شوَيْ، والكبير، بالعكس تماماً، هوّي المهمّ وهوّي القوي وهوّي الغني وإلى آخره من هالشغلات هاي اللي ولو سايدة، هيّي خاطئة.. بيبقى عندك علبتين قد بعضهن بسّ كل واحدة فيها كميّة، واحدة كميّة أكتر من كميّة، وشو هالمشكلة؟ ما إنتَ رح تجي بطبيعة الحال، بطبيعة الطبيعة يا ابني!، رح تجي تشيل القلال وتحطّهن مع الكتار خاصة إنّو إلهُنْ مَحَلّ، يعني حطّيت الأقل مع الأكتر واللي صار شي منطقي أكيد وموضوعي أكيد، ما هوّي حاصل فأكيد موضوعي، يعني هوّي الشي الطبيعي، هيدي الطبيعة، وصار شي كمان أهمّ من كل اللي صار لهلّق إنّو الأقل مش إهانة أبداً، الأقل رح يعمل الأكتر أكتر، ما الأكتر هوّي جمع لكذا قليل.

■ ■ ■



ـــ أكيد أكيد (بمبالغة) العلمانيّة؟ بعد اعطيها شويّة وقت، وإنسى... حاصلة «لا مَحَالة»! ليك لاحظ، نحنا وصلنا نقول لصحن فاضي مثلاً أو لصبّاط مش مريح، «مش معروف شو دينو هالصبّاط!!» وانتبه هاي عند المؤمنين فيها تكون كفر، غير إنّها ذروة الطائفيّة!!... دين الصبّاط؟؟!! يا لطيف!! وبالتالي، كما ذكرتلّك بالبداية، العلمانيّة رح تكون جداً مسهَّلة بسّ لو فينا نعرف شو دينها هالعلمانيّة عالمظبوط.