(السبت 27/6/2009)من مدينة هامبورغ
- عيسى: شو هويّ أكبر سرّ بالعالم، غير أسرار الآلهة وأسرار الطبيعة؟
- مخايل: في أسرار كتير بالعالم.
- عيسى: (بعزم) لا ما في أسرار كتير. أنا رح هوّنلك ياها، منّو سرّ التوبة ولا سرّ «التثبيت»، ولا سرّ العْمَادْ ولا سرّ الزواج، ولا سرّ الكهنوت.
- مخايل: أوف أكبر من سرّ الكهنوت؟!
- عيسى: طبعاً.
- مخايل: العمى شو هوّي هالسرّ هيدا؟
- عيسى: سعر الكلفة.
- مخايل: أها... أكيد؟
- عيسى: إيه أكيد، إعرفلي سعر الكلفة إذا فيك، ولا يمكن، هيدا سرّ ركّبوه «الشرّيرين» لما يعرفوه الأوادم ولا يقدروا يطالبوا بزودة، وإذا طالبوا، ما يعرفوا قدّي إلهن حقّ يطالبوا لأنهن ما بيعرفوا سعر الكلفة.
- مخايل: آه... بس «الشرّيرين» بيعرفوه يعني؟
- عيسى: إلمفروض، بس ما كتير / آخر همومهن، وأوقات بينسوه كمان، إيه شو هنّي اللي عم بيشتغلوا بمعاش ثابت؟! هولي ما بيطيقوا شي ثابت، من هيك بيفضّلوا ينسوه ويتذكروا بس وبشكل غامض، إنّو هوّي كتير عالي.
- مخايل: شو هوّي؟
- عيسى: سعر الكلفة خيّي.

فلاش 21/6/2018

- مخايل: شو عملوا الصينيين لحكموا إقتصاد العالم؟
- عيسى: نزّلوا سعر الكلفة.
اللّي هويّ سرّ الرأسماليّة الدايم لأنّو بس تعرفو، بتعرف:
1ـــ شو فعلاً سعر الكلفة
2ـــ قدّي عم يربحوا
3ـــ قدّي عم يدفعولك، وشو؟
- مخايل: شو؟
- عيسى: يقرطوك... قول وراي شو؟
- مخايل: يقرطوك
- عيسى: يقرطوك إلك...