تلك المغنّية
(إلى فيروز)
يفكّر دائماً في أَنّ تلك المغنّية قد هزَّتْ سريره بالحساسين وحرستْ دروبه بيقظة العاشقة، أَكثر ممّا فعلتْ كتيبة مِنَ العمّات والخالات، أَكثر من جدَّته وجدِّه، أَكثر من أُمِّه وأَبيه. يُفكِّر دائماً في أَنّها علَّمته بصوتها أَكثر مِنْ جَوْقة مُدرِّساته، ومن مطالعاته الطويلة الشاقّة في الأَشجار والكتب وسِيَر مَنْ جاؤوا قَبْلَه إِلى الأَرض. وكيف كان بإمكانه ـــ دون تلك المغنّية ـــ أَن يأَسر بالطمأنينة أَرواحَ الذين قُتلوا وهم يحاولون أَن يجعلوا الفجر حُرّاً في بلادهم. هو قطعاً لم يولد من رحم أُمّه. يهيّأ له دائماً أَنّ تلك المغنّية أَنجبته ــــ دون أَن تدري ـــ مِنْ حنجرتها!

نجوان درويش (القدس)

شو اللي بيميّز صوت فيروز؟

كأستاذة غناء، فيني قول إنو الصوت مش كل شي عند المغنّي. ما بيهمّ كم «أوكتاف» فيه يغنّي. اللي بيهمّ هو شو مخبّى ورا هالنوتات اللي عندو. هل إنو عندو قصة أو إنو بس عندو سلّم موسيقي زابط. الصوت الحلو هو الروح اللي عادةً ما بتنقشع. ومع هيك فنانين متل فيروز وبيلي هوليداي أو نينا سيمون ولويس أرمسترونغ أو ماريا كالاس (أكيد كل واحد بريبرتوار مختلف)، بيساعدوك تشوف الصوت والروح. ومن هون ما فيك إلا ما تقول: آه شو حلو!... ومع غيرهن بتقول: آخ يا راسي، أما شو عاملينلُه (للمطرب أو للمطربة) نحنا؟
صوت فيروز صوت مميز ونادر جداً لانه بيختصر كلام كتير وما بيحب كترة الحكي. صوت فيه الوان مختلفة وهيدا اللي بيخلينا كلنا نشوف معها شو عم بتغني. صوتها فيه لعب وفيه مرح وزعل وفرح وعتلة همّ وسخرية وفيه كرامة ودفا وحنان وكمان فيه مغناطيس بيشد حتى اللي ما بيئرا من اليمين للشمال.
صوتها بيذكرني بالممثلين الكبار مثل فاتن حمامة، مارلون براندو، آفا غاردنر... بيقدر صوتها يلبس حياالله دور... فيه كاراكتير وتمثيل وشعر.
حتى إنو صار صوتها بيشبه السهل الممتنع اللي بتغنّيه.
وصوت فيروز فيه نوع من الدوا لأمراضنا العربية المستعصية... مثلاً كلنا حسينا بغنية «ايه في أمل»... انو اذا فيروز وزياد قالوا هيك يعني خلينا نضل هون... انشالله ما يكون قاصد شي تاني.
اديش غنّت فيروز للطرقات والساحات والمفارق... معقول ما في أوتوستراد باسمها أو شي ساحة فنية مثلاً باسمها او مشروع أو معهد أو مسرح أو صرح ثقافي..
بزعل لما بعرف انو فيروز ما بتترك البيت كتير وما بتشوف ناس كتير. لازم تعرف انو كل بيوتنا هي بيت تاني الها. يا ريت بعرف اي نهار الست فيروز بتستقبل زوّارها... لاني بحب سجّل اسمي.
وكل عيد وهي بألف خير.
غادة غانم (فنانة لبنانية)