أحمد عزام


يُمة
البلاد جوا الروح
ما تختفي
وحال البلد مجروح
زي حالك
كالو المخيم راح يا يمة..
و توجع الجوع وغفي كبالك
يمة إجاني الوطن
ميخِذ هوا فلسطين من شالك
و يقُلي ع الشام اللي صارَت مذبحة
زعلان يا يمة الوطن
رُديلو موالك

(يا ظريف الطول غايب عن الاوطان
و فراقك عنا ملا القلب احزان
و ارجع لامك و ارجع للحنان
ما تلكى الحنية غير في بلادنا)
هدّوا الوطن كُلّا بمخيمنا
و من النهر حتى القهِر
حارات موشومة بجُرِح باكي

عم يمسحوا الأسماء باليرموك يا يُمة
بس الحلُم باقي

بتتذكري أحلى مرا؟
مكصوفة الرَقبة
قُلتيلي يا ابن العرص
فِش أحلى من أُمَك
و ما صدكت ..حتى وكعت
بس وكعت تاكي

تربايتك يمة
آآه.. وِلا؟
حليب المخيم هاظ
قرآن من الله
ويكطع قلب شاكي

كالو المخيم جاع؟!
جاع الخُبِز فينا
بس الكرامة بلاد ما بتجوع
توزع من ال استشهدوا فيها لكُل التاجر بدمنا نفس زاكي

يمكن يردهم أصل
يمكن؟
أيَ أصل يابني
ما الدُور صارت نور
شو نفَع هالكيت ؟
لا تحزني يمة
كل المخيم بيت
و عروك خظرا بركبَتك
مليانة حُرقِة وطن
ع السكة توخذنا
سكة اللي جابتنا
سكة اللي ربتنا
سكة اللي وكف عمرنا فيها
من يوم نكبَتنا

*تم استعمال لهجات مختلفة ضمن روح اللغة الأصلية لضرورة النص اولا ولأن مخيم اليرموك يحتوي على جميع هذه اللهجات بدرجة ثانية